Kommunen har ansvar for å organisere fastlegeordninga og sørgje for at personar som ønskjer det får tilgang til fastlege.
Varsling om forventa avslutning av fastlegeavtale
Når ein kommune blir kjent med at ein fastlege skal slutte, må kommunen varsle Helfo om dette. Det gjer kommunen ved å sende ein kort beskjed til post@helfo.no.
Kommunen treng ikkje å sende varsel om fastlegar som sluttar på grunn av alder. Dette kan Helfo hente informasjon om i eige fagsystem.
Den norske legeforening, KS og Helfo har saman laga ei rutine for melding av fastlegeavtalar til Helfo.
Les meir i Rutine for melding om avslutning av fastlegeavtaler til Helfo (PDF).
Ny avtale for fastlege
Når ein kommune opprettar eller endrar avtale for fastlegar, må kommunen/bydelen sende informasjon om dette til Helfo, slik at vi får oppdatert registeret. Kommunen eller bydelen nyttar skjemaet Melding til fastlegeregisteret (05-04.27), bokmål (PDF).
Legg særleg merke til punkt 4 i skjemaet, der kommunen må krysse av for om fastlegen er spesialist i allmennmedisin eller godkjent allmennlege. Informasjon om dette finn kommunen i HPR-registeret (helsedirektoratet.no). Dette er avgjerande for refusjonsretten til den nye fastlegen, og heimla i forskrift om kompetansekrav i den kommunale helse- og omsorgstjenesten (lovdata.no).
Kryss av i skjemaet for om fastlegen skal vere under spesialisering.
Kommunen må avklare med fastlegen om hen kjem inn under overgangsreglane (dei tre siste punkta i skjemaet). Helfo verifiserer informasjonen etter at Helfo har mottatt skjemaet.
Endra eller avslutta avtale for fastlege
Viss legen ønskjer å endre lista si, og enten auke eller redusere talet på pasientar, må dette godkjennast av ansvarleg i kommunen. Kommunen må krysse av for “Endring” i skjema, ved endring av opplysningar knytt til fastlegelista. Når kommunen opprettar ein ny fastlege-avtale, skal kommunen krysse av for «Ny».
Du finn meir informasjon om fristar for melding til Helfo i Rutine for melding om avslutning av fastlegeavtaler til Helfo (PDF).
Introduksjonsavtale
Når kommunen har inngått introduksjonsavtale med introduksjonslege og fastlegar, sender de signert avtale per e-post til post@helfo.no. Helfo vil då registrere avtalen i våre system slik at den privatpraktiserande introduksjonslegen kan inngå avtale om direkte oppgjer med Helfo. Introduksjonsavtalen er også grunnlaget for refusjonsretten til introduksjonslegen. Les meir om introduksjonsavtalar på helsedirektoratet.no.
Endring i introduksjonsavtale
Viss introduksjonslegen går ut i permisjon/sjukefråvær slik at endeleg sluttdato vert forskyvd, må de som kommune sende e-post til post@helfo.no. E-posten må innehalde informasjon om at introduksjonslegen går ut i permisjon og kva dato denne endringa gjeld ifrå (Helfo treng ikkje informasjon om årsak). Når legen er tilbake frå permisjon ber vi om ny e-post med informasjon om dette.
Send informasjon viss det skjer endringar om kva fastlegar som er knytt til avtalen. Send kopi av oppdatert avtale på e-post eller berre gi nødvendig informasjon i e-post til post@helfo.no.
Informasjon om utekontor
Det er viktig for innbyggarane å finne informasjon om utekontor når dei skal velje fastlege. Kommunen må difor sende informasjon om utekontor til Helfo (post@helfo.no) via skjemaet Melding til fastlegeregisteret (05-04.27), bokmål (PDF).
Helfo må få melding om kva legekontor som har utekontor, og kva fastlegar som er på utekontor.
Opne, lukke og låse fastlegeliste
Det er sett eit listetak på alle fastlegelister. Når lista er full vert ho automatisk lukka. Dette betyr at ein innbyggar ikkje kan velje denne fastlegen, men han kan sette seg på venteliste. Fastlegelista blir opna på nytt når det er 10 ledige plassar. Ein fastlege eller ein kommune kan ta kontakt med Helfo og be om at ei lukka liste vert opna, sjølv om der er færre enn 10 ledige plassar.
Kommunen og legen kan sjå tal på innbyggarar på venteliste ved å gå til sjølvbeteningsløysinga «Bytte fastlege» på helsenorge.no, og deretter søke opp den aktuelle fastlegen.
Låsing av lista
Når ei liste er låst, vil det ikkje komme nye innbyggarar inn på lista, sjølv om det er ledige plassar på lista. Unntaket i § 4 i Forskrift om pasient- og brukerrettigheter i fastlegeordningen, gjeld også her. Innbyggarar kan ikkje setje seg på venteliste på ei liste som er låst.
Kommunen kan i visse tilfelle be Helfo låse ei fastlegeliste:
- Kommunen kan be Helfo om å låse fastlegelista i inntil 3 månader viss fastlegen uventa blir ute av stand til å ta ansvar for fastlegelista. Dette kan for eksempel vere ved død, eller viss legen blir fråteken autorisasjon eller retten til å praktisere for trygda si rekning. Låsing i desse tilfella skal gi kommunen tid til å avklare kva som skal skje vidare med lista.
- Det kan også være aktuelt å låse lista i inntil 3 månader i tilfelle der kommunen har valt manuell fordeling, og har behov for tid til å gjere avtalar med den enkelte fastlege om fordeling av innbyggarar utan fastlege.
- Låsing av liste skal ikkje nyttast for å justere listetaket.
Kommunen kan velje å låse ei liste ved å fylle ut følgjande skjema og sende det til Helfo (post@helfo.no): Melding til fastlegeregisteret (05-04.27), bokmål (PDF).
Opne liste
Ei fastlegeliste vert automatisk lukka når listetaket er nådd. Ei liste som er lukka, vil også automatisk opne seg når lista får 10 eller fleire ledige plassar.
Ein fastlege eller kommune kan ta kontakt med Helfo og be om at ei lukka liste vert opna, sjølv om der er færre enn 10 ledige plassar. Dette kan ikkje gjerast når lista er låst. Ei fastlegeliste som er låst, kan berre opnast etter melding frå kommunen.
Når lista vert opna, er det først innbyggarar som ikkje har fastlege og som er busett i kommunen som kjem inn. Desse står på ei fordelingsliste, og vert tildelt plass når det er ledig kapasitet hos fastlege i kommunen. Deretter blir innbyggarar som står på venteliste, tatt inn. Er det framleis ledige plassar igjen, kan nye innbyggarar velje denne fastlegen.
Varsling ved opning og lukking av fastlegeliste
Legekontoret blir varsla ved opning og lukking av fastlegelister.
Varsel vert berre sendt til legekontor med registrert gyldig e-postadresse i Norsk Helsenett sitt adresseregister. E-postadresser som inneheld «@edi.nhn.no» er ikkje gyldig.
Dersom de ikkje ynskjer slikt varsel, kan de ta kontakt med Helfo via post@helfo.no eller på telefon 23 32 70 40 og be om at varsel vert stoppa.
Deleliste
Avtale om deleliste kan inngåast av legar mellom 60 og 70 år som ønskjer nedtrapping og overføring av praksis til annan lege. Kommunen kan gi skriftleg samtykke til at fastlegen kan fråtre etter fylte 70 år, men delelegeavtalen må vere inngått før hen fyller 70 år. Viss det ligg føre ein tidsavgrensa avtale om vidareføring av fastlegeavtalen ved fylte 70 år, kan delelegeavtalen likevel inngåast etter fylte 70 år.
Lege med minst 50 prosent varig uførleik har også rett til å dele lista si med annan lege på same vilkår.
Formålet med deleliste er å sikre ei gradvis nedtrapping for fastlege som skal avslutte praksis som fylgje av alder eller uførleik.
For å avtale deleliste må også følgjande vilkår vere på plass:
- Legane må arbeide i same legesenter.
- Lengda på lista kan ikkje aukast med meir enn 25 prosent berekna ut frå listetaket ved etablering av delelista.
- Fastlegen kan ha maksimalt 2500 innbyggarar på lista.
Begge legane kan jobbe samtidig på same deleliste
Det blir ikkje oppretta ny fastlegeavtale ved avtale om deleliste, og alle innbyggarane blir ståande på ei og same liste. Lista vil være registrert i namnet til fastlegen, og denne vil formelt sett være pasienten sin fastlege til han eller ho avsluttar sin fastlegeavtale.
Legen som inngår avtale om deleliste er ikkje å sjå på som vikar for fastlegen. Avtale om deleliste vil være å sjå på som ein forskotering av overdraging av fastlegeavtale. Begge legane kan derfor jobbe samtidig på delelista.
Fyll ut skjema for oppretting av deleliste
Viss ein skal opprette eller gjere endringar på ei deleliste, skal ein nytte skjemaet Melding til fastlegeregisteret (05-04.27), bokmål (PDF).
Fyll ut og send skjema til Helfo via post@helfo.no eller via SvarUt.
Les meir om etablering av deleliste
Ved etablering av deleliste gjelder føresegnene i punkta 5.4, 5.5 og 5.6 i Rundskriv A1-2024 til Rammeavtalen for leger (ASA 4310). Du kan lese meir informasjon om deleliste i pkt. 10.8.
Fellesliste
Ein føresetnad for fellesliste er at kontoret har gruppepraksis. Fellesliste betyr ikkje éi felles liste, men alle fastlegane har kvar si fastlegeliste. Fastlegar med fellesliste har felles ansvar for legetilbodet til alle på fastlegelistene. Det er likevel éin av fastlegane som har hovudansvaret for journal og oppfølging. Pasientar kan likevel bli tatt imot og behandla av ein anna fastlege ved legekontoret når dei har time. Når pasientar skal bestille time, kan dei velje mellom alle fastlegane som har same fellesliste.
Kommunane må melde fastlegane som deltek i ordning med fellesliste til Helfo. Fyll ut punkt 3 i skjemaet Melding til fastlegeregistereret (05-04.27), bokmål (PDF).
Det må sendast eit skjema per lege. Send skjemaet via post@helfo.no eller via SvarUt.
Relaterte lenker
Fastlegeordninga er heimla i forskrift om fastlegeordning i kommunene (lovdata.no).